Flèche bas Flèche haut

Liens utiles

Rughjemi ! : Infurmazioni à a carta

Nè i media tradiziunali è sopratuttu nè i cateni di televisioni i più impurtenti, l’infurmazioni scurticati sò sempri trunchi, quant’è un gambarellu à quali manca u capu quandu vi si porta u piattu. Hè di più capiscitoghju nantu à i canali tali chì BFM TV, I Télévision, è tutti l’altri chì passani attualità in abbicciula. Ma nantu à i ghjurnali televisati i più fighjulati di i cateni maiori, si pari sempri chì si tratta di i litessi cosi, à i listessi periudi di l’annu. È mentri, si passa accantu à cosi più impurtenti cà i timperaturi, ò a spassighjata da Rena d’Inghilterra à mezzu à u fiume…

D’estati, cum’è quist’annu à u mesi d’Aostu : « Faci u caldu » ! Infurmazioni d’impurtenza trimenda è passendu quasi pà una surpesa, quand’iddu si fighjola bè. Ogni cateni ne parla, è ne faci a so « una » di u ghjornu…duranti una sittimana sana. D’inguernu, ben sicura ùn si pò micca parlà di a listessa affari tuttu l’annu, a surpesa maiora ghjè…tant tan tan …U FRITU ! Iè bravu ! Cusì forti chì seti !

 È quandu ci hè, in più di quessa, u fattu rarissimu di l’inguernu, a nevi ! Han ! Piantemi tuttu ! I cunflitti internaziunali, a crisi ecunomica, u prizzu di l’essenza, mancu una parodda ! Tuttu ciò chì tena una piazza di prima trinca nè a vita d’ognunu pari sdrughjasi in un batter’ d’ochju à l’affaccata di i primi biocculi, ò di i primi stilli di sudori.

 

Issa facultà scumplessata di i media à quasi piattà i veri infurmazioni pà amparà cosi chì sapemi dighjà (eccetu s’iddu si passa a staghjoni sana nè a so cantina à tichjà si di vinu ò di castagni, O mansa di caghjorni), hè una vera parfurmanza.

 

« Piattà una manu è porghja l’altra », dici u pruverbiu in corsu. Mà da quì à mettala annatu à l’ochji di a ghjenti, ci hè un passa da francà…è forza quiddu passu ùn sarà tandu longu pà quiddi chì vendini l’infurmazioni à noi, povari pecuri accicati da a noscia seta di « routine ». Ci cumpiacemi nè i nosci cutidiani cheti, lindi, piatti quant’è petti di nutatrici chinesi, senza nè una piccula curva pà faci a paura, ommancu una troscia d’oliu pà fà ci sculiscià appena ver di u bassu latu.

 

Eppuru, ci hè sempri calcosa da magnà accantu à a strada dritta di l’infurmazioni. Sapeti, par esempiu, chì in Teheran, s’hè riunitu pà a 16a volta, da u 26 à u 31 d’Agostu scorsi u « Muvimentu di i Paesi Micca Alineati ». Quiddi rassembia oghji centu è vinti stati, tutti insemi pà « l'indépendance nationale, la souveraineté, l'intégrité territoriale et la sécurité des pays non alignés dans leur lutte contre l'impérialisme, le colonialisme, le néocolonialisme, la ségrégation, le racisme, et toute forme d'agression étrangère, d'occupation, de domination, d'interférence ou d'hégémonie de la part de grandes puissances ou de blocs politiques » *.

 

Beddu prugramma… Drentu à quiddu muvimentu, si trovani quantunqua frà altri a Currea di u Nordu, l’Eggitta, a Libia, a Birmania, l’Iranu è l’Iracu, paesi cù un nomi chì faicini cascà i peli, di solitu… eppuru travaddani insemi pà i scopi mintulati quì sopra. Intarissanti cum’è infurmazioni, ommenu curiosu, nò ? L’aveti intesu voi ?

 

È chì a Francia avia cuntratatti inpresti à percentuali negativu (vali à dì chì in più di dà li soldi, li si pagà in più) ? È chì in Irlanda, a detta era cusì maiora, chì i banchi ani accitati di squassà la, è chì u paesi hà pussutu rilancià a so ecunumia ? L’aveti sapiutu voi ? Mancu una parodda, mancu un « flash ».

 

Tandu un ghjornu, internet è i reti suciali trapassarani i media tradiziunali nè a spartera di l’infurmazioni. Twitter, par esempiu, pidda avali una piazza maiora nè u cutidianu, è u vantaghju maioru hè chì a ghjenti scedda l’infrumazioni ch’idda voli avè. Youtube ghjoca dinù un rollu impurtentissimu nè l’infrumazioni nova, cù quì dinù u sistema chì cunsisteghja à metta certi termini in d’avanti à d’altri, mà à a fini, basta à pichjà nantu à a so tastiera d’urdinatori pà andà ver di u sughjettu vulsutu, ùn ci hè nudda d’ublicatu.

Saria quessa, a vera infurmazioni, ùn pinseti? Quidda chì scegliemi noi, è micca quidda imposta da l’altri. Basta à sapè leghja a carta, cum’è à u risturanti, pà ùn fassi avè cum’è un turistu in brama di sensazioni…

                                                                                                                            Liviu CASTEL

*Surghjenti : Wikipedia

Écrire commentaire

Commentaires : 0