Flèche bas Flèche haut

Liens utiles

Cervioni : U museu di l'Adecec diventa museu Anton Dumenicu Monti

La fille et les deux arrière-petites-filles de Anton Dumenicu Monti dévoilent la plaque
La fille et les deux arrière-petites-filles de Anton Dumenicu Monti dévoilent la plaque

Dipoi u sabatu 28 di lugliu, u museu di l'Adecec porta ufficialmente u nome di Museu Anton Dumenicu Monti, presidente fundatore di l'associu. A ceremonia sè fattà piazza Ghjuvanni Simonetti in Cervioni in presenza di a famiglia, di  u cunsigliu d’administrazione di l’ADECEC  è d'amichi numerosi…

Dopu a duie parolle di Ghjacumu Paoli, presidente di l'Associu, Ghjiseppu Leoni presidente di l'annu 1998 fina a u 2008 a detu tuttu sò ch'ellu pensavà di Anton Dumenicu.

Leghjite.

" I musei sò  numerosi. Ci ne hè in Corsica, in Francia è altrò in u mondu.  Quasi ogni cità,  secondu a so impurtanza  hà unu o parechji musei. Ancu qualchì paese hà u soiu, spessu riservatu à un duminiu particulare di a storia,  l’arte nobile, l’artisgianatu, l’armata, l’etnografia, u  vinu…. Parechji portanu  u nome d’una persona celebre o di u so fundatore :  museu Grévin,  Pompidou, Fesch…..

Dapoi  u 1975 Cervioni hà u soiu, dettu  à quandu  « museu di l’ ADECEC », à quandu  « museu  di Cervioni ».

Istu museu ùn s’hè creatu solu, stallatu è prisentatu cum’ellu si po’ vede oghje.

L’idea è u prugettu di creà un museu in Cervioni vene da u prumutore, fundatore è presidente di l’ADECEC, (à l’epuca, prufessore di matematica à u cullegiu)  Anton Dumenicu Monti, omu assinnatu, ghjudiziosu  chì,  bellu nanzu a creazione  di u nostru  associu culturale, in u 197O, s’interessava  à u passatu è facia ricerche storiche,  etnografiche è archeologiche  in raportu cù  u  patrimoniu di a Corsica.

Frà quella trentina di membri ch’ellu avia cuncoltu per fundà l’ADECEC, uni pochi, eranu moltu interessati per u nostru patrimoniu, è a fundazione di l’associu culturale è po’ dopu a creazione d’istu museu,  funu una campa per racoglie, spone,  publicà è valurizà i risultati di e  ricerche.

Fù in iste duie salle à prim’entre di l’anzianu cullegiu - è anticu seminariu - ch’elli so’ stati racolti  è sposti, documenti storichi, cose di i tempi andati, cum’è i primi oggetti archeologichi di e ricerche fatte in e ruine di a chjesa pievania di Santa Maria è in u  Castellu d’Osari.

Tempu apertu u museu, di sittembre 1975, cumencianu à ghjunghje,  in donu o prestu, oggetti, panni, attracci, strumenti, stuvigli, mobuli…, disusati è spessu strani, documenti, ritratti anziani… U presidente i  ricupereghja  è cerca di  truvà una piazza  pè sponeli. Ma u  spaziu principia à mancà.

In una quindecina d’anni, à misura chì u casamentu hè liberatu, Anton-Dumenicu Monti dumanda chì e sale sianu messe à dispusizione di l’ADECEC, ciò   chì  hà  permessu  d’ingrandà  u museu  sin’à  quattordeci sale, nantu’à trè piani,  cù a  mostra  attuale di  2500 passati oggetti è cullezzioni chì cuncernanu  una larga è impurtantissima parte di l’etnografia di a Corsica.

Ma quanti viaghji  A.- D. Monti hà  fattu da Cervioni  à Alisgiani, Orezza, pé  a piaghja da Casinca à Portivechju, per Bastia, Corti, a Balagna,  Aiacciu è l’Alta  Rocca…Fussi per riunioni culturali, o per ricuperà documenti, roba antica : à quandu  una stazzona, à quandu una stamperia… è ancu ottene suvvenzioni  necessarie per pagà u persunale di u scagnu, cumprà  u materiale di l’ADECEC, da a carta à l’ordinatori…, fà stallà è mette in opera a radio di Voce Nustrale, organizà l’emissioni,  cuncepì è rializà à banca di dati di a lingua corsa per infurmatica…  

È quante ghjurnata passate à u scagnu di l’ADECEC ! (à « u bureau » dicia ridoni Madama Monti, quand’omu u chjamava à u telefunu, in casa è s’ellu ùn ci era).

Per fassi un’  idea di u valore, a qualità è l’impurtanza d’istu museu, basta à leghje  e differenti  testimunianze di a ghjente dopu a visita : sò tante lode scritte in u « libru d’oru »  tanti  cumplimenti  chì facenu  onore à l’ADECEC, à Cervioni è …. à Anton Dumenicu Monti.

Anto Dumenicu Monti hà fattu cunnosce Cervioni in tutta à Corsica è for di Corsica. Fundendu l’ADECEC, u so museu,  à so radiu Voce Nustrale, a so banca INFCOR, u dizziunariu di i nomi proprii…;  ma dinù  à traversu e numerose publicazioni di u nostru associu trà e quali una grande parte so’ e soie. In oltre, esciute à l’edizione Sammarcelli, e  « Cronache », una  racolta di fatti storichi  è raconti, trasmessi nant’à  Voce Nustrale è riuniti  in un libru di  470  pagine è,  per compie,  un’opera duv’ellu si n’ampara è chì face onore  à Campulurinchi : « Cervioni et le Campulori au fil des ans ».

In ricunniscenza di  tamant’opera culturale,  cù ammirazione,  rispettu,  di core   è   in ricordu, u cunsigliu d’amministrazione di l’ADECEC, hà decisu di  dà  ufficialmente   un nome à istu museu :  Museu Anton Dumenicu  Monti.

Per ch’ellu fermi sempre cù noi !

Écrire commentaire

Commentaires : 2
  • #1

    cesarini jean (lundi, 30 juillet 2012 14:58)

    Tous mes compliments au conseil d'administration de l'ADECEC,d'avoir donné le nom d'Anton Domenicu Monti,en reconnaissance de son engagement d'une vie pour la culture corse a travers tous ses aspects.
    La cérémonie d'inauguration a été magnifique de simplicité et d'émotion.
    Cette plaque rappellera à tous les visiteurs du Musée le souvenir du fondateur de L'ADECEC,qui était déja dans la mémoire collective des Cervionichi,et de tous ses amis et admirateurs.

  • #2

    GIACOMONI (mardi, 14 août 2012 10:49)

    Onore à Anton Dumenicu Monti. Meriteghja u fundadore di l’ADECEC, u difensore è prumutore di a lingua nustrale, u storicu sapientone d’avè un ricordu tramandatu in Cervioni è in a Corsica sana.

    Luigi G.