Flèche bas Flèche haut

Liens utiles

Festa di a Nazioni : Corti à fucheri è à toni

 

 

A ctià di Corti hà cilibratu l’8 di Dicembri Ghjovi a sera, cù assai animazioni. Ver di 7 ori di sera, a Piazza Pasquale Paoli, induva s’eleva a statua di u Babbu di a Nazioni, s’hè animata, cù una parada d’una dodecina di cumediani, in panni di l’epica. I « suldati » ani fattu frumbà cannoni è vechji pistoli, nanzu di raghjunghja à tuttu u mondu ingiru à un banchettu sottu à l’ochji di a statua di u Ghjenerali.

 

A cità curtinesi hè vissutu eri, duranti tutta a ghjurnata, à u ritimu d’issa ghjurnata assai impurtenti, duva u ricordu di a storia hà primuratu. L’8 di Dicembri, data di l’Immaculata cuncezzioni, è di a pruclamazioni di u « Diu vi salvi Regina » cum’è innu naziunali Corsu, hè statu festighjatu da à Facultà à i carrughji di a cità. Urganizatu cum’è annu da l’associi (Ghjuventù Vagabonda) è i sindicati (Cunsulta di a Ghjuventù Corsa, Ghjuventù Paolina) di u campu, a manifestazioni tinì locu duranti a ghjurnata sana.

A mani, sò stati più d’una sessantina di ziteddi, ghjunti da parechji scoli bislinguii di Corsica, à chì si hè cuntatu appena di storia nurstali, ingiru à tuttu u significatu è à a simbolica di l’8 di Dicembri, è l’impurtenza d’ùn sminticà micca a noscia storia. Un « rallye » educativu attraversu i sfarenti lochi storichi di Corti hà permissu à i ziteddi di raprisintassi di meddu a cosa storica, è d’amparà mentri campendusi, sottu à u celu climentu assai di u paesi di l’orsu. Dopu un dighjunu à u Risturenti Universitariu, i ziteddi ani visitatu u Museu di a Corsica, sempri accumpagnati da i studienti, mubilizata assai pà iss’edizioni. In fini, l’associu « I Naziunali », chì participeghja, frà altri, ogni annu à a ricustituzioni di a battaglia di Ponte Novu, hà rigalatu l’abitanti d’una parada cù tamburieri, cornu, è cannunati.
Dopu à a tradizunali messa à a ghjesa di l’Annunziazioni, a banda si hè addunita piazza Paoli pà sparti un picculu ripastu, trà vinu è ficateddu rigalati da i studienti. Una bedda ghjurnata chèi s’hè compia dopu à a mezanotti, è chì hà senza dubitu palisatu chì a sucità studientina è curtinesi, ùn s’hè scurdata di a so storia. Spiremi chì ci sera ancu più di mondu pà l’annu chì vena !

  O.C.

 

Écrire commentaire

Commentaires: 2
  • #1

    Carlos Laguinda (samedi, 10 décembre 2011 09:42)

    Bell'articulu per una bella ceremonia, è una bella festa.
    Face piacè.

  • #2

    U Palatinu (dimanche, 11 décembre 2011 11:58)

    Mi rallegru eiu dinù di sta festa, di ste ceremonie in core di a Corsica, di s'addunite di tutti i sindicati studienti per un scopu cummunu, di st'iniziative, è di tante ghjente venute.
    Cio chì mi face dinù assai piacè, hè di vede un articulu scrittu sanu sanu in lingua corsa, è vi ne ringraziu, in u mio nome, è in quellu di l'Appuntamentu Corsu di a Tela.